Imprimir esta páxina
11
Febrero

Aberto o prazo para participar no desfile de carrozas e comparsas de Salceda

O Concello de Salceda de Caselas, a través da Concellaría e Festas que dirixe Teresa Pérez, ven de abrir o prazo de inscrición para participar no XXI Desfile de Carrozas e Comparsas que se celebrará no municipio o domingo 3 de marzo de 2019. Durante esta semana serán as agrupacións de Salceda as que poidan formalizar a súa solicitude de participación no desfile, e na semana do 18 ao 24 será o turno para as agrupacións de outros municipios, que poderán ocupar as prazas restantes por orde de solicitude.

 

As comparsas deberán estar formadas por un mínimo de 15 compoñentes, e poderán presentarse con ou sen carroza, establecéndose diferentes categorías en ámbolos dous casos. Ademáis, o desfile completarase co concurso de coplas no que participan tódalas agrupacións. Todas as comparsas admitidas recibirán unha compensación económica pola súa participación, que varía entre os 100 e os 700 € en función do número de compoñentes.


Ademáis da dotación económica, establécese un xamón como premio para diversas categorías: A mellor música en directo, a mellor coreografía, a comparsa máis festeira, a comparsa con maior número de compoñentes, o tema máis orixinal, o mellor vestiario, o mellor maquillaxe, a carroza máis traballada, a carroza máis orixinal, o mellor traballo en conxunto, as coplas máis divertida, as coplas mellor recitadas e o participante de maior idade.


Toda a información e as bases do concurso poden consultarse a través da páxina web www.salcedadecaselas.gal, así como nas redes sociais do Concello de Salceda.


En Salceda o Entroido é unha das súas festas máis grandes, para o que se prepara xa unha ampla programación que será presentada ao completo dentro duns días. “Estamos ante a nosa festa máis tradicional, que en Salceda se remonta a máis dun século de tradición. Agardamos que un ano máis o noso Concello sexa referencia na festa do Entroido e agardamos a visita de milleiros de persoas para o que estamos a traballar xa entre as diferentes concellarías", sinalou Teresa Pérez.


A programación municipal completará o xa tradiconal enfrontamento entre Castro Barreiro e A Feira, que hai xa máis de 125 anos se ven celebrando, e para o que os barrios levan xa tempo traballando arreo no máis estricto segredismo.

Modificouse o Lunes, 11 Febrero 2019 10:02
Valora agora
(0 votos)