Alumnas e alumnos dos centros educativos, IES do Barral, IES Val do Tea e CEIP Ramiro Sabell Mosquera de Ponteareas traballan, dende o pasado mes de febreiro, no deseño, planificación e execución parcial dun proxecto conxunto que ten como finalidade crear un “camiño escolar” que una os tres centros educativos.
Trátase de habilitar unha ruta peonil, segura, respectuosa co medio ambiente e que que propicie as relacións entre o alumnado. A iniciativa busca involucrar nela non só a comunidade educativa, senón aos veciños e veciñas en xeral. As reunións de traballo son desenvolvidas polos equipos seleccionados por cada centro escolar, composto por alumnado e profesorado voluntario e que contan co asesoramento de dúas arquitectas designadas polo Colexio de Arquitectos.
O proxecto destes centros educativos ponteareáns, que conta co apoio do Concello de Ponteareas a través da Concellería de Ensino, foi presentado a Ludantia, I Bienal Internacional que se celebrará en 2018 na cidade de Pontevedra. Este encontro, no que se compartirán experiencias con outras iniciativas de 21 países, que xa figuran inscritos, recollerá experiencias sobre Arquitectura e Educación coa finalizade de recuperar o espazo urbano para os xogos dos máis pequenos.
A concelleira de Ensino, Cristina Fernández, destacaba “a importancia que supón para Ponteareas, a unidade e colaboración que amosan as direccións e profesorado destes centros escolares, que coas ideas e traballo do alumnado farán posible unha actuación urbanística propia que facilite a convivencia e mellore o medio ambiente en Ponteareas”.
Con esta finalidade, o Concello de Ponteareas porá a disposición do alumnado, planos urbanísticos e a información técnica que necesiten e sexa requirida para a execución dos proxectos.
Pola súa banda, o alcalde, Xosé Represas, expresaba o seu convencemento de que “é preciso facer que os nenos e nenas fagan seu o territorio local no que ter espazos propios de lecer”. Nese sentido, matizaba Represas, “é prioritario dispoñer dunha cidade onde a veciñanza sexa partícipe do seu deseño, permitindo ser máis responsables e mellorar a calidade de vida de todos
