A candidatura encabezada por Francisco Jesús Represas Carrera , músico da agrupación, foi elixida por unanimidade o pasado 11 de febreiro de 2017 para xestionar esta Banda de Música Ponteareá durante o período 2017-2020.
Acompañan na Xunta Directiva ao Sr. Represas Carrera, os seguintes membros: vicepresidenta, Blanca Represas Alonso, secretaria, María Represas Alonso, tesoureira, Silvia Fernandes Táboas e vogais, Segunda Carrera Iglesias, Ana María Acebedo Varela e Manuel Collazo Francisco.
Tanto a presidencia como a maioría dos novos cargos directivos da Banda de Música Xuvenil de Xinzo (BMXX) recaen por primeira vez en músicos de contrastada traxectoria da propia agrupación musical, como eixo da nova organización e liñas de traballo que se desenvolverán no seo da agrupación durante os tres próximos anos.
Dende a nova directiva, adiantan que o principal obxectivo no que vertebrarán tódalas súas accións, será o do crecemento cualitativo e cuantitativo da Banda de Música Xuvenil de Xinzo e da súa Escola de Música. Nestes últimos anos a Banda de Música Xuvenil de Xinzo vén de acadar diversos premios e recoñecementos a nivel municipal, provincial e incluso autonómico. En palabras do novo presidente “Agora chega o momento de dar un paso máis na nosa consolidación como unha das bandas máis prestixiosas da provincia de Pontevedra. Pero este crecemento pasa en primeiro lugar por sentar unhas bases de xestión sólidas nos aspectos organizativos, laborais, administrativos e económicos, que permitan enfocar o futuro mais inmediato con completa seguridade. Acompañándose todo isto dun proxecto artístico novidoso, dinámico e ambicioso”.
