8 equipos de enfermería do Sergas e persoal sanitario de Doral Residencias recepcionaron e comezaron a distrubuír desde primeira hora da mañá de hoxe 400 doses da vacina contra a COVID-19 de Pfizer. Residentes das áreas de xeriatría e discapacidade, xunto con traballadores e traballadoras das dependencias de Doral Residencias en Mos foron os receptores da tan esperada vacina que o director do centro, Manuel Añón, describía como “o mellor agasallo posible para esta víspera de Reis”.
O procedemento estivo supervisado e apoiado tamén desde os servizos de Atención Especializada e Medicina Preventiva do Hospital Álvaro Cunqueiro.
Entre os residentes que esta mañá recibiron a vacina estiveron os dous internos de maior idade de Doral Residencias, Constantino Freire de 104 anos e Carmen Román Rocha de 101. Ambos vacináronse cheos de optimismo e animando a todo o mundo a facelo, xa que eles mesmos superaron a enfermidade e confían nos bos resultados da vacina.
