A Garda Civil investiga por un delito de falsificación documental ao responsable e tres traballadores dunha empresa pirotécnica da provincia de Barcelona que fornecía material pirotécnico a un comercio autorizado no sur da provincia de Pontevedra, con documentación supostamente falsificada.



A investigación que realizou o Equipo de Policía Xudicial da Garda Civil de Tui iniciouse por mor dunha inspección que realizou a Intervención de Armas e Explosivos da mesma localidade nun establecemento autorizado para a venda deste tipo de material pirotécnico, onde se incautaron 225 quilos destes produtos cando a capacidade máxima de almacenamento autorizada é de 50 quilos. 



Ao sospeitar que tanto os albarás como as cartas de porte que amparaban a compra e transporte destes produtos pirotécnicos poderían estar manipulados ou ser manifestamente falsos, realizouse con autorización xudicial unha inspección no establecemento provedor situado na provincia de Barcelona onde se detectaron irregularidades nos asentos contables tanto nos Libros Rexistro como nos Libros Auxiliares da empresa.



No transcurso da inspección, a Garda Civil incautouse de diversa documentación, soportes informáticos, que xunto coa análise dos  tacógrafos dos vehículos que transportaban a mercadoría, reforzaron desde o punto de vista dos investigadores os indicios sobre a presunta falsificación documental que se estaba investigando.

Con este modus operandi posibilitábase que o establecemento comercial, situado no sur da provincia de Pontevedra, puidese almacenar ilegalmente unha cantidade superior á autorizada, o que podía supoñer un serio perigo para a seguridade cidadá, ao exceder en 175 kg, de produtos pirotécnicos  almacenados.



As investigacións da Garda Civil concluíron coa investigación penal do responsable e os tres empregados da empresa provedora por un delito de falsidade documental e a denuncia administrativa do propietario do local comercial en Pontevedra.