A Garda Civil incautouse dunha partida de roupa e calzado, supostamente falsificada, nun control selectivo de vehículos no municipio de Tui.
Os feitos sucederon durante a tarde do pasado venres, día 21, no transcurso dun control selectivo de vehículos que estaba a realizar os efectivos do Posto da Garda Civil de Tui, á altura do quilómetro 72 da estrada PO-52, termo municipal de Tui.
Nun dos vehículos inspeccionados, conducido por un veciño de Vigo, a Garda Civil atopou unha partida de roupa e calzado con etiquetas, supostamente falsificadas, de acreditadas firmas comerciais, que presuntamente se pretendía vender en postos de venda ambulante na comarca.
Ao comprobar os compoñentes da patrulla que o condutor do vehículo carecía da correspondente factura de compra, así como da preceptiva autorización das marcas rexistradas afectadas, procedeuse á incautación preventiva de algo máis de 160 pezas de vestir (camisetas, suadoiros, chándales e pantalóns), ademais de 40 pares de zapatillas deportivas, cuxo valor total no mercado pode superar os 4.000 €uros.
O condutor e propietario do vehículo foi notificado como presunto autor dun delito contra a propiedade industrial. As dilixencias instruídas, xunto coa roupa aprehendida, serán entregadas no Xulgado de Instrución de garda de Tui.
